TELU MANUK PENGABIS MIT. ANEH TAPI BENAR

TELU MANUK PENGABIS MIT

Tu meh telu ti nyelai serta mit. telu tu burak lalu enda sama enggau telu manuk menua bukai

Jarang kita bisi tetemuka telu manuk indu pansut besais mit, kala endang sigi kala tang jarang kitai meda iya enggau mata kitai empu, pemesai iya lebih kurang mesai tunjuk indai tang utai tu meh ke nyadi ngagai siku manuk ti bisi ditupi aku. 

Jalai pengidup manuk ti mansutka telu nya pan narit ati laban asal iya enda ulih ditentuka, engka iya manuk kampung, manuk antu, manuk menua tauka manuk nama tang terus terang aku madah aku enda menu asal usul manuk nya laban indai manuk tu diulih aku ari kaban aku ti ngelantak manuk tu.  

Indai manuk ti dikumbai aku betuah 

Penyelai manuk ti betelu mit tu:
1.Maya iya mit, enda parai dilantak kereta tang cover kereta pecah lalu tama ba enjin kereta.
Manuk tu ditupi aku ari mit udah iya dilantak kereta kaban aku. Cover mua kereta Proton Saga (senentang enggau radietor) iya pecah lalu manuk tu lekat ba enjin kereta nya. Iya ti nyelai agi, kaban aku nya mikir manuk nya udah mati laban enda dipeda agi udah iya ngelantak manuk nya. Kereta nya lalu dibai iya enggau manuk nya lekat dalam enjin nya penyauh kira-kira 25 kilometer sebedau iya madah ngagai aku ba siti kedai kopi.

kereta kaban aku En. Wahi ti ngelantak manuk nya ari 

jambatan Isu lalu dibai iya terus ngagai kedai capitan, simunjan.

Ketegal kaban aku tu tadi orang islam, nya iya enda tau makai bangkai manuk. Iya lalu nanya aku samada aku deka makai manuk ti dilantak iya tadi. Aku madah tau ga, lalu kami duai sama-sama deka ngambi manuk nya. Aku meda cover mua kereta iya balat pecah. Orang bukai meda pan sigi mikir manuk sigi gerenti parai enti dilantak bakanya.Lebuh maya ngambi manuk ti lekat ba enjin kereta nya tadi, manuk nya agi peli-peli mata iya. Diabas aku, nadai ga darah, luput enda,bakal enda meh. Aku cukup iran ati.Kaban aku nya pan iran meh ati. manuk nya lalu ditupi aku.Ag mit iya maya nya. Enda ditemu manuk indu tauka manuk laki. Enti laki, aku deka nupi iya nyadika manuk sabung enti udah besai. Tang udah iya besai, manuk nya manuk indu. Frust mimit ga ati laban iya enda ulih disabung.

Pemesai iya lebih kurang mesai duit syiling 50 sen

2. Nemu engkukuk maya dikurung.
Laban iya manuk nyelai (ayam ajaib) ko ati aku, aku lalu ngurung iya manah-manah enggai ka iya lenyau. Ditupi enggau manah, Nyau setengah taun ditupi, dia manuk indu nya lalu nemu engkukuk. Apai aku orang ti keterubah iya ninga iya engkukuk. Mula-mula aku enda pecaya, udah nya indai aku pan madah pekara nya ngagai aku. maya ujung minggu, maya enda gawa, aku lalu nguji mending amat tauka enda. Kira-kira pukul 10.30 iya pan engkukuk tang enda lama. sebulan dua iya bakanya. Nya ti ngasuh aku majak alit ati. Bala kaban aku madah, tau dipiring manuk nya. Enda aku bangat peduli enggau cadangan sida laban ba runding aku engka manuk indu pan tau engkukuk sekali sekala. Kitai ga ukai orang tuai ti diau ba rumah panjai ti agi megai pengarap lama.

3. Betelu ka telu besais mit.
Suah iya betelu tang ngelama tu telu iya normal. Nada penyelai semina telu iya burak enda baka telu manuk biasa ti ditupi kitai. Engka manuk tu manuk asal ari kampung. Endang burang ari telu manuk menua ti bukai. Iya betelu mansutka telu ti besais mit nya kena 14/6/22013 tu. Kebetulan ko melayu, lemai sebedau nya anak aku bisi tetemu ka batu ti nyelai pemerat iya ba tisi batang Sadong. Sais iya mit tang berat iya nyelai amat. hari siti nya aku lalu tepedaka sigi ari telu manuk nya tadi besais mit dalam tansang iya. Telu nya lalu disimpan aku, diambika bukti telu besais mit sigi amat bisi. Iya ti ngasuh aku cukup alit ati laban manuk nya cukup betuah enda mati, lalu nemu engkukuk, diatu iya lalu mansutka telu ti besais mit.

Aku mansutka cerita tu dalam internet ngambika kitai sama-sama nemu penyelai manuk indu tu. Enti kita ngasai cerita tu semina bula aja, kita tau nanya aku enggau silik agi ba komen dibaruh. Lalu enti kita ka nemu tauka meda enggau mua mata kita enpu telu tu enggau silik agi kita mega tau ngirum email madah ngagai aku ba: majalah_apai@yahoo.com

Tu telu nya begulai enggau enam igi telu ti sama indu.